BAARISH KI BOONDEIN

Yeh baarish ki boondein ehsaas hain ,

Lagti hain yeh aansu, jab koi udaas hai …..!!

Jo khush hai uske liye naachti hain ,

Jo tanha hai, sukh dukh sang baant-ti hain …..!!

Garajte baadal thahaake bhi maarte hain ,

Bijli ke sang baatein bhi banaate hain …..!!

Zinda hone ka ehsaas dilaati hain ,

Yeh boondein chupke se kaanon mein kuchh bataati hain …..!!

Kabhi tez, kabhi dheemi, to kabhi tham hi jaati hain ,

Baarish ki boondein zindagi jeena sikhaati hain …..!!

Jeevan na guzarta ek hi tarah ka kabhi ,

Thamta, chalta to daud jaata hai kabhi …..!!

Abhi tez hai to dheemi bhi hogi iski gati ,

Aaj udaas hai to agle mor par chhipi hai khushi …..!!

Iski dor pakad dheeraj se bas chalte hi jaana hai ,

Na hataash, na niraash, har sthiti mein humein muskuraana hai …..!!

Boondon ki maati se milan ki bheeni bheeni sugandh jaise ,

Zinda rahe dil mein zindagi jeene ki umang waise …..!!